Dagtilboðið verður skipað á Virkis- og venjingarstovuni á Boðanesheiminum, har Heðin Mortensen, borgarstjóri, og Bjørghild Djurhuus, forkvinna í trivnaarnevndini, í dag vitjaðu saman við øðrum úr fyrisitingini.

Í samsvari við eldrapolitikkin, sum Tórshavnar býráð hevur samtykt, verður við tilboðnum dentur lagdur á heilsustimbran og fyribyrging.

Endamálið er, at tann aldrandi borgarin rørir seg, fær heilsugóðan kost, er virkin og hevur møguleika at gera ítriv, handarbeiði og handverk.

Knýtt at Virkis- og venjingarstovuni eru ergo- og fysioterapeutar, heilsurøktrari og heilsuhjálparar.

Ætlandi kunnu 15-20 fólk taka lut í smærri bólkum soleiðis, at tey møta 1-2 dagar um vikuna.

Gerandisdagurin á Virkis- og venjingarstovuni byrjar við morgunmati. Venjingar og aktivitetir annars verða løgd eftir tørvi hjá tí einstaka.

Aktivitetir so sum bindiklubbur, undirhús, dansur og bingo eru løgd í fasta vikuætlan. Annan hvønn fríggjadag er harumframt guðstænasta kl. 11.00-12.00 í samkomuhøllini Tórslon.

Døgurði og seinnapartsdrekka eru eisini partur av tilboðnum.

Heilsu- og umsorganartænastan hevur samstarv við hýruvognsfelag um koyring til og frá. Tey, ið hava tørv á serflutningi (til koyristól), kunnu søkja um at nýta serflutningstænastuna hjá Tórshavnar kommunu.

Dagtilboðið kostar kr. 95 um dagin, tá er íroknað matur og flutningur.

Tey, ið ynskja at taka lut í hesum nýggja heilsustimbrandi dagtilboði, skulu lata umsókn inn til Heilsu- og umsorganartænastuna.

Umsókn til dagtilboð og flutning fáast við at venda sær til Heilsu- og umsorganartænastuna, tel 30 20 00, har tað eisini ber til at frætta meira um tilboðið.