Borgarstjórin í Havn hevur úr at gera fyri tíðina at gifta bæði útlendingar og føroyingar. Vígslustøðini kunnu vera í samkomuhúsum, í urtagørðum, í býráðssalinum ella í hansara egna fundarhøli á Ráðhúsinum, har tey flestu verða vígd.

 

Tað kunnu vera føroyingar, sum búgva uttanlands, sum ynskja at koma heim at gifta seg. Eisini eru fleiri útlendsk pør, sum eru vígd á Ráðhúsinum í Havn. Slíkir fyrispurningar koma alla tíðina.

 

Umframt nevndu støðini hevur borgarstjórin vígt fólk líka frá Adventistakirkjuni og Ebenezer til Argjahaga og heilt upp á Slættaratind. Men sum sagt eru flestu vígslurnar á Ráðhúsinum – serliga hesa tíðina av árinum.

 

Trýstið á borgarstjóran at gifta fólk er vanliga størst um páskirnar, undan ólavsøku og á jólum. Tað vindur eisini uppá seg við útlendskum pørum, sum ynskja at verða vígd av borgarstjóranum í høvuðsstaðnum.

 

Vígslur eru bílagdar langt fram í tíðina. Men hesa tíðina plagar at vera friðarligt. Men so er ikki í morgin, tá fýra pør skulu giftast á ávíkavist Ráðhúsinum og í býráðssalinum. Og tað er nýtt met fyri ein dag.