Tað var undir øllum umstøðum ein syndarlig sjón at síggja í 2015, hvussu skúlastjórin gekk uppá ovasta loft, fyri at halda skúlan lens. Ein kann ímynda sær, hvussu inniklimaði er í einum slíkum bygningi – fukt og svampur – eitt stað, sum er við at gerast heilsuskaðiligt at húsast í.

Aftur her er eitt dømi um, at ein almennur bygningur í Havn vantar pening til viðlíkahald.

Mentamálaráðharrin virkaði eitt sindur ivasamur at játta pening til ein almennan stovn í Havn, hví tað? Úrslitið síggja vit - háskúlastjórin skal nú ganga runt í Havn og á ein eyðmýkjandi hátt biðja havnarfólk stuðla Føroya Fólkaháskúla, sum landi umsitur og hevur ábyrgdina av at viðlíkahalda.

Hevði hetta hent í veljaraøkinum hjá mentamálaráðharranum ella handlaði hetta um Tekniska Skúla í Klaksvík, so hevði hvør króna verið játtað og meira við.

Tá so háskúlastjórin er liðugur at bidda í Havn, so skulu ongir hjá tí almenna seljast, áðrenn takið kann skiftast út. Hetta er ein provokatión og háðan ímóti Føroya Fólkaháskúla, bara tí hann liggur í Havn.

Stevna Háskúlans er at vekja ans fyri mentan og máli, søgu og samfelag, og undirvísingin byggir bæði á tað andaliga, handaliga og skapandi. Háskúlin vil menna og upplýsa, bæði tað einstaka menniskjað og felagskapin allan. Sostatt handlar leikluturin hjá Føroya Fólkaháskúla um mentan og sosiala menning í samfelagnum fyri ávísar bólkar, sum hava tørv fyri tí, serliga ung fólk.

Skulu vit bara standa og hyggja at og góðtaka slíka vanrøkt av einum stovni. Nei, eg fari í hvussu so er ikki at góðtaka hetta. 

Eg fari tí at heita á landsstýrismannin í Mentamálum, Bjørn Kalsø, um at játta tað, sum skal til fyri at skipaði viðurskifti aftur valda á Føroya Fólkaháskúla – ivist ikki í, at landsstýrismaðurin finnur eina skilagóða loysn og játtar neyðuga peningin.