- Føroyar hava millum annað fyrsta floks reglur um, hvussu økir, har fiskaaling fer fram, skulu umsitast. Hetta vita tey í Noregi, sum nú vilja læra, hvussu føroyska lóggávan á økinum virkar. 

Hetta sigur Johan Dahl, landsstýrismaður í vinnumálum, sum hevur havt fund við norska fiskimálaráðharran, Elisabeth Aspaker.

Norska stjórnin er farin undir at endurskoða sína alilóggávu, og í hesum sambandi ynskir hon at fáa kunnleika til føroyska alilóggávu – serliga í mun til økisumsiting.

Broytingar í norsku alilóggávuni eru eisini áhugaverdar fyri Føroyar, tí at tær í størri mun nýta metingar, umhvørvi og burðardygd sum stýringstól fyri framtíðar menning av alivinnuni.

Hetta samstarv byrjar nú á embætismannastigi, og samstundis verður nú arbeitt við spurninginum, um og hvussu avtala kann gerast millum Føroyar og Noreg um granskingarsamstarv innan alivinnu, serliga við atliti at ES-granskingarskránni Horizon 2020.

- Tað er fyrimunur fyri báðar partar at samstarva, og økt gransking innan aling kann vónandi vera við til at flyta okkara vinnu víðari fram á leið og við tíðini styrkja sterka føroyska kappingarførið upp aftur meira, sigur Johan Dahl, landsstýrismaður.