Jólini byrja nú leygardagin
Jólamennirnir vitja, jólatræið verður tendrað, jólasmátturnar lata upp og skoytubreytin letur upp!
Jólatræið á Vaglinum verður tendrað 29. november kl 15.30. Tað er Visit Tórshavn, sum aftur í ár samskipar átakið Jól í Miðbýnum. Eftir at jólatræið á Vaglinum er tendrað, verða hini jólatrøini í Tórshavnar kommunu tendrað.
Aftur í ár koma jólamennirnir á vitjan og við góðari hjálp frá børnunum á Vaglinum fara teir at tendra jólatræið. Jólatræið er aftur í ár ein gáva úr Reykjavík, og í sambandi við at jólatræið verður tendrað tann 29. november, vitjar Sóley Tómasdóttir, býráðslimur í Reykjavík.
Tiltakið Barnajól verður leygardagin 6. desember. Hetta er eitt tiltak, sum Margarinfabrikkin skipar fyri. Hetta fara vit eisini at hoyra meira um sum frálíður.
Leygardagin 13. desember kemur jólaskipið inn á Vágsbotn við øllum jólamonnunum, sum bara gleða seg at sleppa at heilsa uppá øll børnini í Føroyum. Við sær hava teir sjálvandi eina rúgvu av karamellum.
Jólabýurin letur uppaftur í ár. Hurðarnar vera ólæstar, og øll eru hjartaliga vælkomin at støkka inn á gólvið og síggja jólaprýddu smátturnar. Eisini koma jólamenn í býin á rossabaki. Hetta verður sunnudagin 21. desember.
Aftrat hesum kann nevnast, at jólavikuna, tað vil siga seinastu vikuna áðrenn jólaaftan, hava handlar í býnum leingi opið, ein rúgva av jólatónleiki verður í býnum og sjálvandi eisini jólamenn við karamellum. Somuleiðis vera sølubásar í Tinghúsgarðinum, har møguligt verður at keypa sær kakao og annað gott.
Eitt fullfíggjað yvirlit er á www.visittorshavn.fo/jol