Løgmaður fekk høvið at heilsa uppá amerikanska uttanríkisráðharran, John Kerry, á ráðharrafundinum.
Løgmaður á ráðharrafundi í Kanada
Løgmaður, Kaj Leo Holm Johannesen, luttekur í døgunum 24. og 25. apríl á arktiskum ráðharrafundi í Iqaluit í Kanada. Hetta er níggjundi ráðharrafundurin hjá Arktiska Ráðnum, og endin av kanadiska formansskapinum. Evnið fyri formansskapin hevur verið “Development for the people of the North”, t.e. menning fyri fólkið á Norðurleiðum.Ráðharrafundurin er samstundis byrjanin til amerikanska formansskapin. Amerikanski uttanríkisráðharrin, John Kerry, luttók á fundinum og legði ætlanirnar fram fyri komandi tvey árini. Evnið verður “One Arctic: Shared Opportunities, Challenges and Responsibilities”, og høvuðsdenturin verður lagdur á umhvørvi og veðurlagsbroytingar.
“Eg eri spentur uppá ætlanirnar hjá amerikanska formansskapinum um at seta tiltøk í verk fyri at menna varandi orkukeldur í Arktis. Sum eg eisini vísti á í mínari røðu, hava vit virðismiklar royndir í Føroyum við at vinna orku burturúr eitt nú vindi ”, sigur Kaj Leo Holm Johannesen, løgmaður.
Ráðharrarnir samtyktu Iqaluit yvirlýsingina, ið varpar ljós á úrslitini undir kanadiska formansskapinum og arbeiðsøkini hjá nýggja formansskapinum.
Ráðharrafundurin endar leygardagin 25. apríl við einum tiltaki, sum borgarstjórin í Iqaluit er vertur fyri saman við leiðaranum fyri Nunavut landslutinum.
Til ber at síggja ráðharrafundin her: www.arctic-council.org
Røðan hjá løgmanni er uml. 30 min. inni í brotinum.
