Hvussu kann tað bera til, at borgarstjórin í høvuðstaðarkommununi fær undirtøku frá býráðnum, at hann kann vera borgarstjóri og løgtingsmaður samstundis, meðan borgarstjórin í Klaksvík, av meiriluta í býráðnum, verður noyddur at velja antin borgarstjórasessin ella løgtingssessin.

Seinastu árini hava fleiri borgarstjórar sitið í Løgtinginum og røkt báðar sessirnar.

Hetta valskeiðið hevur borgarstjórin í Runavík boðað frá, at hann røkir báðar sessirnar til nýggjárs, borgarstjórin í Vestmanna situr í báðum sessum restina av kommunu-valskeiðinum, og borgarstjórin á Tvøroyri, ið situr í báðum sessunum, umhugsar støðuna.

Tað eigur ikki at kunna setast spurnartekin við avgerð hjá býráðum, um talan er um vælvilja/ illvilja ella politisk motiv.

Tí skuldi tað verið klokkuklárar mannagongdir, sum avgjørdu, um ein borgarstjóri fær møguleikan at røkja løgtingssess, samstundis sum hann er borgarstjóri.

1. Heldur landsstýriskvinnan, at talan er um prinsippmál, har allir borgarstjórar eiga at vera javnstillaðir? 

2. Heldur landsstýriskvinnan at talan er um javnbjóðis treytir, tá t.d. borgarstjórin í Tórshavn og fleiri øðrum kommunum kunnu sita í báðum sessum, meðan borgarstjórin í Klaksvík, skal velja annan sessin frá? 

3. Hevur landsstýriskvinnan í kommunumálum somu áskoðan sum fyrrverandi, at borgarstjórar settir fulla tíð, ikki samstundis kunnu sita í Løgtinginum? 

4. Hevur landsstýriskvinnan ítøkiligar ætlanir um at fremja broytingar í kommunustýrislógini?