Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Rentan er metlág og landskassin fær ágóðan

Rentan, sum Føroyar rinda í sambandi við lántøku, er minkað nógv seinastu átta árini. Landið kann tryggja sær eina lága rentu í fleiri ár, um landsstýrið tekur fleiri langfreistað lán.

Í 2011 var rentan av lánsbrævaskuldini hjá landskassanum í miðal 3,037%. Í 2018 rindaði landskassin bara ein triðing 1,068% í miðal í rentu av sínum lánum á 4,6 mia. kr. (Mynd 1). So nógv er rentan minkað, at lánsútreiðslurnar hjá landskassanum eru góðar 90 milliónir krónur minni, enn um rentan var á sama støði sum í 2011, og um skuldin eisini var tann sama.

Nú rentan er metlág er hetta eitt gylt høvi hjá landinum at taka langfreistað lán – tað eru lán, sum hava langa afturgjaldstíð. Hetta hevði tryggjað eina lága rentu, og harvið lágar lánsútreiðslur í nógv ár. Í løtuni eru lánini hjá landskassanum stuttfreistað, sum hevur við sær, at landið oftari skal út at endurfíggja.

Les eisini: Skuldin hjá landinum minkar, men lánini eru ov stuttfreistað
Hóast stuttu lánini eru bíligari, kann hetta sum frá líður hava størri váða og størri lánsútreiðslur við sær. Hetta vísir Moody’s eisini á í seinastu kredittmetingini.

Les eisini: Føroyski landskassin fær framvegis metingina Aa3 við støðugum útlitum

Stóra rentuminkingin seinastu árini er millum annað úrslit av lágum búskaparligum virksemi í evrulondunum (tey, sum brúka evru sum gjaldoyra), og at fleiri evrulond hava lutfalsliga stóra skuld.

Evropeiski miðbankin ECB heldur rentustøðinum niðri fyri at stimbra virksemið í evrulondunum og fyri at lætta um skuldarbyrðuna hjá mest skuldartyngdu evru­londunum. ECB hevur keypt lánsbrøv fyri stórar upphæddir. Hetta hevur økt um pengamongdina á evrumarknaðinum seinastu árini og soleiðis verður rentan trýst niður.

Les meir ársfrágreiðingini hjá Landsbankanum fyri 2018.