Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Støðan og leikluturin hjá pápum í Føroyum skal granskast

Dan Klein --- 15.09.2018 - 08:15

Granskingarnevndin hevur játtað stuðul til eina nýggja granskingarverkætlan á Fróðskaparsetrinum.

Verkætlanin, sum er um leiklutin hjá pápum í Føroyum, kallast: Faðirskapur í broyting? Kanning av gerandislívinum, familjuviðurskiftunum, og maskulinitetinum hjá monnum – tvørtur um tvey ættarlið – í Føroyum í dag.

Verkætlanin skal m.a. varpa ljós á hesi viðurskifti:

- Hvussu lýsa og forklára menn sjálvir sínar myndir av einum góðum pápa – sæð í mun til egnar royndir, strategiir og mál.

- Á hvønn hátt kann føroyska familjusøgan sigast at hava ávirkað ráðandi myndirnar av pápum og faðirskapi í samfelagnum í nýggjari tíð?

- Kunnu menn, sum hava ymiska bakgrund (aldur, stað, kynssamleiki, osfr.), sigast at umboða ymsar pápa-stílar í dag?

- Hvønn leiklut hava javnstøðupolitikkurin og -kjakið fyri støðuna hjá føroyskum pápum í familjuviðurskiftum í dag?

Firouz Gaini er verkætlanarleiðari. Aðrir luttakarar í verkætlanini eru Runa Preeti Ísfeld, Lív Patursson, og Kári Holm Johannesen. Ann-Dorthe Christensen, professari á universitetinum í Aalborg, luttekur eisini.

Játtanin til verkætlanina er kr. 705.588. Restin av fíggingini kemur frá Fróðskaparsetrinum, CeMAS á Aalborg Universitet og Nordplus.

Hendan verkætlanin var ein av teimum, sum søkti stuðul úr Granskingargrunninum í vár.

Hóast hon tá varð mett avgjørt stuðulsverd, fekk hon ikki játtan í fyrsta umfari, orsakað av avmarkaðu fíggjarorku grunsins. Tá tað í summar gjørdist greitt, at ein áður stuðlað verkætlan steðgaði, gjørdi granskingarnevndin av at játta hesi verkætlanini tøku upphæddina í stuðli.

Sí allar játtaðar verkætlanir í Stuðulsyvirlitinumhttp://ark.axeltra.com/